LAL ISUA ZUI

                                                                         - Zoremsanga Colney

           Tin, amah vekin, mi zawng zawng hnenah, “Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se.  Tupawh a nun humhim duh apiangin a chan ang a; tupawh keimah avanga a nun chan apiangin, chu mi ngei chuan a humhim ang.

      Tin, kalkawnga an kal laiin tuin emaw a hnenah, “I kalna apiangah ka zui ang che,” a ti a.  Tin, Isuan a hnenah, “Sihalten kua an nei a, chungleng savate pawhin bu an nei a, Mihring Fapa erawh hi chuan a lu nghahna a nei lo,” a ti a. (Luka  9:23-24, 57-58)

Isua zui kan tih hian sawi kual duah ngai lovin kan hrethiam thei mai ang chu,kawng a mi kan in zui ang a zui ni lovin, ringtu chuan kan rin Isua Krista tih ang ti a, mahni tisa nawmna ni lovin Lalpa duh zawng eng nge ni tih ngaihtuah reng chung a, he kan dam chhung a a duh zawng tih hi a hnung zuina chu ti mai i la kan hrethiam mai ang chu.

Engtin nge Lal Isua kan zui ang?

Bible chang kan tarlan Luka 9:23-24 ah hian Lal Isua kan zui dan tur chu kan hmu a ni. Nitin mahni hreawm pawisa lova a kross pu a amah zui turin min ti ani. Mahni theuh in ngaihtuah i la ringtu nunah hian harsatna tam tak kan tawk thin, kan chhungkua ah, kan fate ah leh kan eizawnna ah te, thil chi hrang hrang mahni ah ngei te pawh a ni ang.  Heng thil zawng zawngah te hian Lal Isua kan zui ngam tak tak dawn em?

Tin, ringtu nunah hian thlemna a nasa duh khawp mai, Setana hian kan châk zawng leh duh zawng takte hmang hian min han thlem kual a a harsa thin. Rawngbawlna a Lal Isua kan zuina kawng kan zawh zel naah hian kan nun hian min pawt let fo thin reng a ni. Nihmahsela hei hi hre reng i la, chutiang a lo thlen pawhin heng harsatna leh hreawmna hmunah hian Lal Isua chuan amah zui tlat turin min duh a ni.

Tunlai khawvelah phei chuan rinawm taka amah zuitu a duh a ni. I/Ka zui ve thei dawn em?

Eng vangin nge kan zui ang?

Lal Isua hian mi zawng zawng hi a hnung zui turin min ko a, ringtu thlarau a piangthar tawh phawt te chuan Lal Isua an zui thin a, amah zui tlat tute chu chatuan nunna a pe thin. Rawngbawltu zawng zawng hna chu Lal Isua zui a ni.

Tin, pianthar loh chuan Lal Isua a zui tak tak theih loh a ni. Lal Isua hian mi zawng zawng hi a mah zui turin min ti lui lo. Luka 9 : 57-58 thu ah kan hmu, mi zui rawh chu a ti ngei a, mahse mi zui ngei ngei ang che a ti lo. Amaherawh chu mahni duhthlanna ngei hmang a amah zui tur a inpe te chu lawm takin a pawm a, kawng hreawm ral \itna leh hling tam tak awmna pawh nise him takin a hruai thin. Chuvangin Lal Isua kan zuina ah hreawm tih changte, harsatna, manganna, lungngaihna, khawharna hmunah pawh chhel takin i zui ang u.

Chuvangin mahni theuh ngun takin inngaihtuah i la, kan sawi tak zawng zawngah te khian keimahni ah hian miten Isua hi zui chhan tlak an hmu em tih ngaihtuahin, Isua hi miten a zui tute ah zui chhan tlak ani tih an hmuh theih nan te, a zui tute lawman hmu tlak  ni turin chatuan a nun min petu Lal Isua hi a Kohhran ho, ringtu te hian Van thlen thlengin izui tlat ang u. Khawvel nawmna, mahni tisa nawmna nge i thlan ang, Lal Isua ka duh ber min hruaitu atan i ti dawn.

Lalpa’n a thu malsawm rawh se.

Thalai Entu Feb3 phek 2-na

Thalai Entu Feb3 phek 1-na

Kum 2013 Sunday School

Beginner Department

Beginner Zirtirtu

Primary Dept.

Junior Dept.

Primary Zirtirtu

Intermediate Department 

Inter Zirtirtu

Junior Zirtirtu

Senior Dept.

Senior Department Zirtirtu te

Puitling Sunday School Zirtirtute

NPSS Zirtirtu te

KUMTHAR THUCHAH

                          C. Lalzawmliana

                KTP member zawng zawngte kumthar chibai vek ule.  Kum bul kan tan chho leh ta a, theihtawp han chhuah tlang leh teh ang aw. Hruaitu kan ni emaw, member kan ni emaw, mahni zawn theuhah mawhphurhna kan nei a, chumi tihlawhtling tur chuan phur loh chang leh chak loh chang pawh a kan tih hram hram zel a tul a ni. Member nih ve satliah ngawt a tawk lova, hming lo pek a, thawhlawm lo thawh ve chuan a tawk a ngai mai member kan awm fo thin chu chu member nih dan tur leh nihphung a ni mai lo, pawlin a mamawh ang a thawh leh pawl thil tumte hrechianga, tih hlawhtlin hi member nih dan tur chu a ni. Kumin chu member dik tak nih theuh i tum teh ang u.

             KTP te hi Kohhran hnuaia peng pakhat kan ni a, Kohhran kut ke, Kohhran hnathawh tipuitling tur kan ni tih hi theihnghilh loh a tha hle. KTP thiltih a phur viau, Kohhran inkhawm leh Kohhran thiltih danga lang ngai miahlo KTP hruaitu/member nih a hlauhawm. Kohhran hi kan ngai pawimawh hmasa ber tur a ni ang. Inkhawm lova hla zir leh inkhawm lova item dang zir tura Biakin lam pan ching KTP member nih te hi a in hmeh lo. Pathian lam pan a kan kal zel atul khawp mai. Chanvo leh nihna ngaihpawimawh leh hruaituten ti tura min tih hlen thin mi, mahni nihna a lawm thiam, midang thik te, nihna leh chanvo duh viau tlin mang silo te, chanvo pek a phat reng mai te, midangte sawisel reng mai KTP member ni lovin, Krista rilru pu chunga midangte tan a kawm nuam, thawhpui nuam nih zel kan ching tur a ni.

          KTP leh hla zir hi thil inkawp tlat a ni a, hla zir na a tel na chang i hriat loh chuan KTP ah i tui tak tak thei lovang. I thiam zawng leh tuina a nilo a nih pawhin tel ve zel mai rawh, atawpah chuan i tui ve mai ang. KTP a tui thei tak tak lo, KTP member tam tak hi han chhui chian hian hla zirna a telna chang an hriatloh vang ani fo mai. KTP member active tak ni tur chuan hlazirna a tel tlat mi nih hi thil tul tak pakhat a ni; abak, inkhawm leh hnatlang te chu tih tur awm reng a awmsa a ni a, tui khawpa tel atul a, engpawhmai hi tui a phur tur chuan tih tam atul hmasa ani.

         Aw le hei, tunah Branch KTP chuan chanchinbu kan han tharthawh leh ta a. Kum 2007 kumtawp lam a tanga kan lo tawpsan tawh chu kan han chhuah tan leh ta chu a ni a. Board member te kut a dah bik mai lovin, thu chhuah kawngah te, tawiawm leh thilpek te, engemaw zawng tal a tha thawh theuh i tum ang u. Kohhran nu leh pa te pawh in hma a sawn zel theih nan a man pek kawngah te pawh thahnem ngai a theih tawp min chhuah pui turin kan sawm a che u. Kum 2004 March thla a Branch hruaitute chuan ‘CHITEANS’ tia hming vuahin chhuah tan a rel a, a chhuah hmasak ber April thla chuan Editorial Board te ngen angin ‘MERCURIA’ tia hming vuah leh nghal a ni. Kum 2005 April thla atangin ‘ENTU’ tia hming thlak leh a ni a, kum 2007 November ni 16 thleng tih chhuah a ni, chuta tang chuan vawiin thleng hian chhunzawm lovin kan pamtul ta ani. Tunah ‘THALAI ENTU’ tia kan han thar thawh leh ta chu ani a, a hlamzuih tawh loh nan member zawng zawng leh Kohhran nu leh pa ten theihawp i chhuah theuh ang u.

          Pawl reng reng chu committee rorel anga kal zel kan nih angin, mahni duhdan kalpui mai a rem lova, kan duhloh zawng anga kal a ngaih chang a tam thin. Mahni duhdan a tlang loh avang a thil ti tha duh lo kan awm thin te hian pawl a ti thuanawp thin. Sawiseltu ni lova, thurawn pe a fuih thin mi, pawl leh hruaitu ten an mamawh a, tawngka chauh nilo a, a thawk a thawk thin pawlin a mamawh bawk. “Kei…kei…” tih aiin “nang…nang…” tihna ah thawh ho anuam a, pawl a chak zawk thin.Kristian Thalai Pawl (KTP) a ni a, Krista duhzawng a kal a pawimawh ber, a dawtah hruaitute zah ngai a, kal thiam a tul.  Kan thlen chin atangin hma i sawn theuh ang u.